![enchiladas med kjøttdeig og bønner og spinat](https://kvardagsmat.no/wp-content/uploads/2019/03/20190310-_DSC6791-6.jpg)
Enchiladas med kjøttdeig og bønner
![enchiladas med kjøttdeig og bønner](https://kvardagsmat.no/wp-content/uploads/2019/03/20190310-_DSC6791-3-768x1024.jpg)
Enchiladas med kjøttdeig og bønner er perfekt å servere når du har restar frå fredagstacoen. Ved å tilsette litt ekstra ingrediensar får du både ein ny rett og du får brukt opp restane i kjøleskapet. Har du ikkje restar følger du oppskrifta under, der får du steg for steg.
![enchiladas med kjøttdeig og bønner og spinat](https://kvardagsmat.no/wp-content/uploads/2019/03/20190309-_DSC6788-768x1024.jpg)
Eg har med vilje brukt lite kjøttdeig, slik at du skal bli inspirert til å bruke opp den lille slanten av kjøttdeig som ofte ligg igjen etter familie-tacoen. Mindre matsvinn og mindre bruk av kjøtt er jo heilt i tråd med anbefalingane som har kome siste åra. Og så smakar det nydeleg likevel!
Enchiladas med kjøttdeig og bønner
![enchiladas med kjøttdeig og bønner og spinat](https://kvardagsmat.no/wp-content/uploads/2019/03/20190310-_DSC6806-768x1024.jpg)
Til enchiladas kan du gjerne servere guacamole, salsa, rømme, tortillachips, salat eller steikt mais. Her er det opp til deg kva du likar, eller kva du har i kjøleskapet som du vil bli kvitt. I oppskrifta brukar eg heimelaga pizzasaus (som vi alltid har liggande i frysaren) og heimelaga tacokrydder men her kan du sjølvsagt bruke butikk-kjøpt om du ikkje har det klart heime.
Oppskrift på Enchiladas med kjøttdeig og bønner
- 100-200 g kjøttdeig
- 2 ss olivenolje
- 1 løk
- 2 sjampinjongar
- 2 fedd kvitløk
- 2 ss tacokrydder
- 1 boks kidneybønner
- 65 g babyspinat
- 2-3 dl pizzasaus
- 6-8 tortillalefser
- 1-2 dl riven ost
- 2 vårløk
Steik kjøttdeiga og set til side.
Del løken i terningar og surr i olivenolje til løken er blank. Ha i sjampinjong i terningar og la steike med til soppen har fått farge.
Ha i finhakka kvitløk og tacokrydder og bland godt.
Skyl kidneybønnene i eit dørslag og la renne godt av seg. Ha bønnene i gryta saman med spinaten. Rør i gryta til spinaten har fallt saman.
Ha 2/3 av pizzasausen i gryta, spar resten til seinare.
Fyll tortillalefsene og snu dei med skøyten ned. Legg dei på rad i ei eldfast form og smør resten av pizzasausen på toppen. Strø ost på og gratiner i omnen. Bruk anten grillelementet i nokre få minutt, eller steik på 225 grader over- og undervarme i ca 20 min til osten er gyllen.
Topp enchiladasforma med vårløk i ringar og server med det same.
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.