Kyllingwok med chili og cashewnøtter

Denne retten er i likheit med black pepper beef ein sikker vinnar å bestille på restaurant eller i dei mange food court’ane her i Asia. Den finnast i utallige variantar og etter tråling i dei nyinnkjøpte kokebøkene og på nett fann eg ein versjon som passa for oss. Her i Kuala Lumpur får vi kjøpt store pakkar med tørka raud chili, men om du ikkje får tak i det kan du sjølvsagt bruke fersk chili eller «chili flakes» (samme type som brukt i tacokrydder-oppskrifta).

Til 3-4 personar treng du:

Saus:

• 2 ts soyasaus
• 2 ss ketjap manis (sweet soya sauce)
• 2 ss thai fiskesaus
• 1,5 ss brunt sukker
• 2 ss vatn

Wok:

• 2 ss olje
• 3-4 (500-700 g) kyllingfiletar
• 3 fedd kvitløk
• 1-2 løk
• 4-5 tørka raude chili (eller 1 ts chili flak, og smak til)
• 100-150 g cashewnøtter
• 1-2 vårløk
• 1 raud paprika
• 1 gul paprika
• 1 grøn paprika

Slik gjer du:

1. Rør saman sausen.
2. Finhakk kvitløken og del løken i båtar.
3. Del paprika, chili og vårløk i litt større bitar.
4. Del kyllingen i bitar.
5. Steik kyllingen i litt olje, ha over på ein tallerken og set til side.
6. Fres kvitløk, løk og chili i litt olje til løken er blank.
7. Ha i paprika, vårløk og cashewnøtter og la frese med i 1-2 minutt på høg varme.
8. Ha kyllingen tilbake i woken.
9. Hell over sausen og bland den godt inn. La sausen frese godt i panna. Ferdig!
10. Servér med ris til; håper det smakar!