Tacosuppe

Eit alternativ til den tradisjonelle Tacoen, eller ein fin måte å bruke opp restar dagen derpå. Suppe er super middagsmat, og med tacosmak bør det vere lettare å få barn og unge til å ville ete det også:)

Til 3-4 personar treng du:

• 400 g kjøttdeig/karbonadedeig
• 1-2 løk
• 2 fedd kvitløk
• 1 raud paprika
• 3-4 ss maiskorn
• 1 boks hakka tomat (eller 3-4 ferske tomatar)
• 2 ss tomatpuré
• 1-2 ss tacokrydder
• 7-8 dl vatn
• Nøytral olje til steiking (eg brukte kokosolje)

Slik gjer du:

1. Del løk, kvitløk og paprika i terningar.
2. Leit fram gryta du skal lage suppa i og fres løk og kvitløk i litt nøytral olje, til løken blir blank.
3. Ha i kjøttdeig/karbonadedeig og hakk den opp i mindre bitar.
4. Ha over tacokrydderet og bland godt inn.
5. Tilset tomatpuré, hakka tomat og vatn.
6. Kok opp.
7. Ha i paprika og mais og la småkoke i 10-15 min. Spe eventuelt med meir vatn, om det blir for «tørt».
8. Server gjerne med nachos, ein rømmeklatt og litt reven ost.