Oksehalegryte med rotmos
Oksehalegryte med rotmos er middagen du kan servere etter å ha vore ein heil dag ute på ski. Perfekt å brune kjøtet litt etter frukost, legge det i ei eldfast form og la kose seg i omnen heile dagen. Jo lenger jo betre, her vil du at kjøtet skal sleppe beinet heilt. Kjøtet må i allefall stå i tre timar, gjerne i seks.
Oksehalegryte med rotmos
Oksehale er ikkje kvardagskost å finne på butikkane i mitt nærmiljø, så når eg kjem over dette handlar eg inn til frysaren. Perfekte å lage deilig kraft av, og nydelege i ei god-tid gryte som dette.
Oksehalebitane eg har brukt her tok eg rett frå frysaren. Dei blei bruna først i panne og så inn i omnen. Då måtte kjøtet stå i fem timar før det var klart, men det fekk stå ei time ekstra likevel. Dette er ein rett som toler å vente på at middagsgjestane får dusja og skifta etter skituren. Perfekt mat til påska altså.
Oppskrift på Oksehalegryte med rotmos
Oksehalegryte
- 1-1,5 kg oksehale
- 1 ss rapsolje/smør
- 2-3 sjalottløk
- 1 purre
- 3 gulrøtter
- 1/4 sellerirot
- 2 dl rødvin
- ca 8 dl vatn
- 2 laurbærblad
- 1 ts salt
- 1/2 ts pepar
Rotmos
- 8-10 poteter
- 3/4 sellerirot
- ca 3 dl H-mjølk
- 1 ss smør
- 1/2 ts salt
- 1/4 ts pepar
Set omnen på 150 grader over- og undervarme.
Brun oksehalebitane i ei varm steikepanne med oljen/smøret, legg så over i ei eldfast form. Skrell og del gulrot, sellerirot og løk i grove bitar. Del purreløken i ringar. Legg alt i den eldfaste forma. Hell over rødvin og vatn. Ha i laurbærblad, salt og pepar. Set forma midt i omnen og la den steike i 5-6 timar, til kjøtet er så mørt at det fell frå beinet.
Lag rotmos 30 min før alt skal serverast. Skell og del poteter og sellerirot i teringar. Kok opp og la småkoke til alt er mørt, ca 15-20 min. Hell av kokevatnet og ha i smør. Mos med ein potetstappar og spe så med mjølka til passe konsistens. Ha i salt og pepar og servér saman med oksehalegryta.
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.
