Raud pastasalat med kylling

Denne salaten smakar nydeleg og er super å lage kvelden før. Den held seg fint i kjøleskap og er god å ta med på tur eller ha med i lunsjboksen.

Dette er fin mat å servere venninnegjengen eller ha i eit selskap, sidan den kan lagast i førevegen og det ikkje gjer noko om du lagar for mykje. Då har du nydeleg restemat. Du kan sjølvsagt blande i dine grønsak-favorittar, og bruke denne oppskrifta som ei base.

Raud pastasalat med kylling til omlag 4 personar:

• 4 kyllingfiletar
• 1 ss paprikapulver
• 300 g fullkornpasta
• 1 pk sukkererter
• 1 boks cherrytomatar
• 3 vårløk
• ½ rødløk
• 1 pk ruccola
• 1 glas fetaost

Dressing:

• 3 fedd kvitløk
• 1 raud chili
• 1 glas soltørka tomat inkl. oljen
• 1 ts tomatpuré
• ½ raud paprika
• saft av 1 lime

Slik gjer du:

1. Lag dressingen først. Fjern frø og hinne frå chilien og ha den saman med resten i ein blender el.l. og kjør til det blir ei jamn masse. Spe med litt olivenolje dersom det blir for tjukt for blendaren din. Set til side.
2. Kok pasta i lettsalta vatn, til den er ”al dente” etter ca 7-10 min. Ha over i dørslag og skyl med kaldt vatn.
3. Del kyllingen opp i bitar og strø over paprikapulveret medan du steiker det i litt solsikkeolje.
4. Skjær vårløken i ringar, rødløken i små båtar, sukkerertene i bitar, del cherrytomatane i to og riv ruccolaen i litt mindre lengder og ha i ein stor bolle.
5. Bland dressingen inn i pastaen, og ha den i salatbollen saman med kyllingen.

Server med fetaost og gjerne godt brød.

TIPS: dressingen held seg i allefall ei veke i kjøleskap og er fin å ha ståande. Bruk den gjerne i andre rettar, eller smør den på ei brødskive og legg ost på så har du nydelege ostesmørbrød på få straksar.