Fiskekaker med søtpotetchips

Fiskekaker med søtpotetchips var middagen vår i dag. Raskt og godt, og ikkje meir tidkrevjande enn at det kan stå på middagsbordet ein heilt vanleg kvardag!

Eg kjøpte torskefilet på butikken i går, men her kan du nytte den fisken du vil. Oftast er det sei, torsk og lyr som er enklast å finne på butikken, og alle desse tre er glimrande til fiskekaker!

Denne gongen var det søtpotetchips og cottage cheese-dressing som fekk vere med på tallerkenen. Søtpotetchipsa tek lengst tid, så dei må i omnen først og få lov til å vere der medan du lagar fiskekaker og rører saman dressingen. Likevel er middagen klar på 30 min!

Fiskekaker med søtpotetchips

Til omlag 4 personar

Fiskekaker

• omlag 500 g fiskefilet
• 1 ss potetmjøl
• 1 ts salt
• litt peppar
• 1/4 ts muskat
• 1 ss finhakka grasløk
• 2-3 dl mjølk
• litt smør til steiking

Søtpotetchips

• 1-3 søtpotet (avhengig av storleik)
• 2-3 ss olivenolje
• 1 ts flaksalt

Cottage Cheese-dressing

• 3 ss Cottage Cheese
• 1 ss majones
• 1/4 ts salt
• 3-4 skiver sylteagurk
• 1 klype peppar

• grøn salat

Slik gjer du:

Søtpotetchips:

1. Set omnen på 250 grader over- og undervarme.
2. Skrell og del søtpotetene i stavar (chips-storleik) og legg utover eit bakepapirkledd steikebrett.
3. Ringle over olivenolje og strø over salt.
4. Set inn i omnen og skru ned til 230 grader. La stå i ca 25 min, til dei er nesten litt brende og knasande på utsida. Kik inn avogtil og flytt eventuelt litt på dei om det trengst.

Fiskekaker:

1. Del den kalde fisken i store terningar og kjør den i ei matmølle (foodprosessor) til det er ei ganske jamn masse.
2. Ha i potetmjøl, salt, peppar, finhakka grasløk og litt av mjølka. Kjør vidare.
3. Spe med mjølka og kjør mølla til du har ei jamn og fin masse.
4. Varm smør i ei panne og form små kaker som du legg i panna. Steik på middels-høg varme, slik at fiskekakene blir bruna og får god smak.
5. Snu og steik på andre sida.

Cottage Cheese-dressing:

1. Bland alt og kjør glatt med ein stavmiksar (eller finhakk og bland for hand).

Server nysteikte fiskekaker med grøn salat, søtpotetchips og Cottage Cheese-dressing. Velbekomme!