Sjokoladefondant med karamellfyll

Sjokoladefondant med karamellfyll har både deilig flytande sjokolade og karamell i midten, og smakar like godt som det høyrest ut.

Å lage karamellen er veldig enkelt, men krev litt tid. Du treng ei boks søt kondensert mjølk (ikkje Vikingmjølk – den er ikkje søta) og ein stor kjele med vatn. Boksa skal koke i 3 timar, men held seg deretter i lang tid i ei tett boks i kjøleskapet. Dermed kan du lett lage dulce de leche lenge før du skal lage denne desserten, og ha karamell klar i kjøleskapet.

Finn du ikkje søt kondensert mjølk kan du bruke Dumle-trikset som du finn heilt under oppskrifta her.

Til 4 porsjonar treng du:

• 100 g mørk sjokolade
• 100 g smør
• 50 g kveitemjøl (eller glutenfritt mjøl)
• 100 g sukker
• 2 egg
• 2 eggeplommer
• Litt kakaopulver og smør til formene
• Dulce de leche (sjå under)
• 4 klyper salt

Slik gjer du:

Dulce de leche (karamell):

1. Fjern etiketten på boksa med søt kondensert mjølk.
2. Legg boksa i ei stor gryte, og fyll fullt med vatn.
3. Kok opp og la småkoke i 3 timar.
4. Hell av vatnet, avkjøl med kaldt vatn før du opnar boksa.
5. Oppbevar i tett boks i kjøleskapet (dette held seg lenge) og bruk i dessertar, over is eller som ekstra godt pålegg.

Sjokoladefondant:

1. Set omnen på 200 grader over- og undervarme.
2. Hakk sjokolade og smelt over vassbad saman med smøret.
3. Visp egg, eggeplommer og sukker til luftig eggedosis. (Visp lenge med kjøkkenmaskin.)
4. Vend inn sikta mjøl i eggedosisen.
5. Vend inn smelta smør og sjokolade. (Set røra i kjøleskapet om du ikkje skal servere med det samme.)
6. Smør formene med smør, slik at kakene slepper forma lett og sikt i litt kakao og fordel røra.
7. Ha i 1 stor teskei med karamell/dulche de leche i kvar form og ei klype salt.
8. Steik midt i omnen i ca ti minutt, til toppen har heva seg litt frå forma men det framleis er rennande røre når du sjekkar med ein kakepinne. Kanskje er det perfekt med 8 eller 12 minutt i din omn, følg med!
9. Snu forma opp ned på ein tallerken, eller server i formene, med sikta kakao over.

TIPS:

• Sjokoladefondant kan fint lagast glutenfritt. Bruk då gultenfri kakemiks/fint mjøl i staden for vanleg kveitemjøl.
• Har du ikkje dulce de leche kan du legge 1 stk dumle-karamell i kvar form i staden, eller ha i HaPå-pålegget som du finn på butikken.
• Vil du sjå fleire steg for steg bileter finn du det her.