Proteinrundstykker med gulrot

Proteinrundstykker med gulrot er ein vri på proteinrundstykka som har blitt populære både her i heimen og på bloggen, og det med god grunn. Å kunne røre saman deiga og slenge dei rett i omnen er jo gull når du treng brødmat ASAP, og når dei i tillegg smakar saftig og digg i tillegg blir dette ein vinnar.

Denne versjonen testa eg forrige veke då eg fekk ei god venninne på frukostbesøk, og mangla noko å servere. I løpet av ein halvtime var bordet dekka og nysteikte rundstykker komne på bordet. Og sånt blir det jo god stemning av!

Til 16 stk treng du:

• 500 g (2 små boksar) cottage cheese
• 500 g havregryn
• 4 egg
• 1 ss bakepulver
• 1 ts salt
• 150 g gulrot

Slik gjer du:

1. Set omnen på 180 grader varmluft (eller 200 grader over- og undervarme).
2. Skrell og riv gulrot på eit fint rivjarn.
3. Ha cottage cheese, egg, bakepulver og salt i ein bolle og kjør glatt ved hjelp av ein stavmiksar (eller bruk ein blender).
4. Vend inn havregryn og gulrot og klapp saman til ei jamn deig.
5. Trill runde ballar, trykk litt flate og sett på bakepapirkledd steikebrett.
6. Steik midt i omnen i 20 min, til rundstykka er gyldne.
7. Avkjøl på rist.