Daimiskake med marengsbotn

Daimiskake med marengsbotn er laga med utgongspunkt i Iskake med Daim og Mokkaiskake med sjokolade og marengs. Tanken var å ta det beste frå begge kakene og kombinere det til ei særdeles god kake. Daim med sin karamell er nydeleg i iskremen og marengsen gir ei ekstra fin kake med ein herleg crisp. Kaka blei kjempe god!

daimiskake med marengs

Daimiskake med marengsbotn

Min eigentlege plan var å pynte med kaka med hakka Daim…men nokon (les: meg) hadde ete den opp ein sein kveld;) Men fortvil ikkje om du hamnar i samme situasjon, hakka kokesjokolade funka finfint! Har du ikkje balsamicoeddik på kjøkkenbenken kan du bruke kvitvinseddik, eddik eller sitronsaft i staden.

daimiskake

Iskaker er perfekte å lage på førehand og ha klar i frysaren når festligheitene nærmar seg. Å berre kunne ta med ei kake frå frysaren, utan å stresse dagen før er gull. Denne har gelatin i seg, slik at den skal halde seg ekstra godt når den står på eit kakebord. Utan å smelte vekk første minutta.

daimiskake med marengsbotn

 

Oppskrift på Daimiskake med marengsbotn

24 cm / 8-10 porsjonar / Tid: 30 min + 2 dagar avkjøling/frysing

Botn

  • 4 eggekviter
  • 175 g sukker
  • 1 ts balsamicoeddik
  • 1 ts maizena

Topp

  • 3 plater gelatin
  • 1 dl sterk kaffi
  • 4 eggeplommer
  • 100 g sukker
  • 5 dl kremfløyte
  • 1 dobbel Daim

Pynt

  • 50 g hakka sjokolade (eller Daim)
  1. Botn:
    Set omnen på 150 grader over- og undervarme.
    Dekk ei rund kakeform med bakepapir i botn.
    Ha eggekviter og halvparten av sukkeret i ein heilt rein bolle og visp til det skummar.
    Ha i resten av sukkeret gradvis og visp til du har stiv marengs. Rør inn balsamico og sikt inn maizena.
    Ha marengsen over i kakeforma og dra marengsen oppover langs kantane, slik at den dekkjer kantane godt. Nesten som eit fuglereir.
    Steik midt i omnen i 1 time, skru så av omnen men la kaka stå og avkjøle i omnen over natta.
    Merknad: dersom du vil ha heilt tørr marengs kan du utvide steiketida til 2 timar før du let den avkjøle i omnen over natta.

  2. Topp:
    Legg gelatinplatene i bløyt i kaldt vatn i 10 min. Knip ut vatnet og rør dei inn i kaffien til alt er oppløyst.
    Pisk eggeplommer og sukker til eggedosis. Bland i kaffien. (Pass på at ikkje kaffien er for varm, og bland inn i ein tynn stråle.)
    Pisk kremfløyta til krem. Bland inn hakka Daim.
    Bland saman eggedosisen og kremen. Ha over i forma, dekk med plast og frys ned.

  3. Servering:
    Skjær rundt langs kanten, slik at kaka losnar frå forma.
    Fjern kakeringen.
    Hakk opp sjokolade og legg på toppen.

[print-me target=".oppskrift"]

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Likar du det du ser på bloggen her? Bestill mi første kokebok her!