Pølse- og makaronigrateng

Pølse- og makaronigrateng hugsar eg godt frå skulekjøkken. Skikkeleg “comfort food” av typen som du kan ete berre med ei hand. Dette brukar jo å vere ein sikker vinnar blant born, så for kidsa sin del var det på tide å vere litt retro og introdusere denne slagaren.

pølsegrateng

Vanlegvis lagar ein kvit saus og rører inn med egg, men eg fekk tips om at det var nok å berre røre inn egg i mjølk og nysgjerrig som eg er måtte eg teste. Det funka finfint og gjer at dette verkeleg er ein rett som kidsa kan vere med å lage. Eller kanskje lage heilt sjølve om dei er gamle nok til det?

pølse og makaroni grateng
TIPS:

  • Set meir smak på gratengen ved å bruke spanande pølser og ostar med meir smak.
  • Tilset gjerne frosne erter og gulrot i gratengen.
  • Bytt ut makaronien med blomkål.

makaronigrateng

Oppskrift på Pølse- og makaronigrateng

3-4 porsjonar

  • 300 g makaroni
  • 500-600 g grillpølse
  • 4 dl mjølk
  • 4 egg
  • 1/2 ts muskatnøtt
  • 1/2 ts pepar
  • 1 ts salt
  • 2-3 dl riven ost
  1. Set omnen på 200 grader.

  2. Kok opp ei stor kasserolle med vatn og ei klype salt.

  3. Ha i makaronien og la den småkoke i 7-10 min. Hell av vatnet og la dampe tørr.

  4. Del pølsene i bitar.

  5. Visp egga inn i mjølka og bland inn krydderet.

  6. Bland saman makaroni, pølser og mjølkeblandinga.

  7. Ha over i ei eldfast form (ca 2 liter) og ha over ost.

  8. Steik midt i omnen til osten er gyllen og gratengen har blitt fast, omlag 30 min. Følg med på slutten så den ikkje blir brend.

  9. Server gjerne med kokt brokkoli til.

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Likar du det du ser på bloggen her? Bestill mi nye kokebok her! #reklame