Langpannebrød med rug og havre

Langpannebrød er supert å ha i matpakken, og krev lite innsats. Du trykker brøddeiga utover i ei langpanne, ruter opp og steiker. Så er det berre å bryte opp til rundstykker og fylle med dine favorittar, eller nyte nysteikte halve rundstykker med smør og brunost… Mmmm!

Til ei langpanne (16 stk) treng du:

• 600 g kveitemjøl
• 200 g havregryn
• 200 g finmalt rugmjøl
• 6 dl lunka vatn
• 1 ss honning
• 1 ts salt
• 1 pk tørrgjær

Slik gjer du:

1. Elt saman alle ingrediensane i om lag ti minutt ved hjelp av ei kjøkkenmaskin eller for hand så lenge du orkar.
2. Dekk til og la heve til dobbel storleik.
3. Ha deiga over i ei bakepapirkledd langpanne.
4. Trykk deiga uttover til den er jamn, fukt fingrane med litt vatn så går det lettare.
5. Legg eit klede over og la heve i 30 min.
6. Set omnen på 200 grader.
7. Rut opp deiga, ved hjelp av ein skarp slikkepott eller ein kniv, slik at det blir 16 bitar.
8. Pensle med litt vatn og strø over litt havregryn om du vil.
9. Steik midt i omnen i ca 30 min, til brødet er gyllent under.
10. Avkjøl på rist.

Brødet er fint å fryse. Del det i rundstykker, og ta opp så mange du treng. Tin dei anten på kjøkkenbenken eller ved å setje dei inn i kald omn og skru omnen på 150 grader varmluft. La dei steike i ca 12 min, så har du varme og sprø rundstykker klar.