Kvardagsvaflar

Kvardagsvaflar er litt sunnare vaflar som du kan ete i staden for brødskiver når brødboksen er tom eller du har lyst på noko ekstra godt til frukost eller kveldsmat. Desse passar fint å ha med i matboksen óg, og kan serverast med det du måtte like av pålegg.

Mitt forslag er rykande varme med syltetøy på, eller avkjølte i matboksen dagen etter med eit salatblad, ost og skinke. Har du ein favoritt må du gjerne legge igjen eit hint i kommentarfeltet under:)

Kvardagsvaflar

Til 8-10 vaffelplater treng du:

• 1,5 dl kveitemjøl
• 1,5 dl sammalt kveite (både grov og fin funkar)
• 1,5 dl havregryn
• 1/2 ts salt
• 1 ts bakepulver
• 4 dl mjølk
• 2 egg
• 2 ss smelta smør

Slik gjer du:

1. Ha alt det tørre i ein bolle.
2. Spe med litt og litt av mjølka og rør med ein visp slik at du får ei røre utan klumpar.
3. Visp egga lett saman med ein gaffel og ha dei i røra.
4. Bland til slutt inn smelta smør.
5. La røra svelle i 15 min før du steiker vaflene i vaffeljarn.
6. Avkjøl vaflene på rist, og oppbevar resten av røra i kjøleskap om du ikkje får brukt alt med ein gong.