Risengrynsgraut

risengrynsgrøt

Graut (eller grøt om du vil) er standard laurdagslunsj hjå oss. Det veit gutane, og dei veit óg at etter grauten kjem laurdagsgodtet. Då er vi sikra at dei et litt skikkeleg mat og ikkje berre godteri, og sukkernivået er nede igjen til dei skal legge seg om kvelden. Funkar som gull!

Vi kokar stort sett alltid graut medan ein av oss står og rører i gryta nesten heile tida. (Dette er faktisk ei oppgåve vi kranglar om å få utføre, for det betyr at ein kan lese laurdagsavisa i fred og ro ein halvtimes tid medan ein sit/står og rører.) Men om du ikkje har lyst til å stå å røre i gryta kan du lage dynegraut eller langtidskokt graut. Eg gir deg her begge versjonane så kan du velje sjølv korleis du vil koke grauten din:)

Til 4 porsjonar treng du:

  • 3 dl grautris
  • 18 dl mjølk
  • 1/4 ts salt
  • kanel og sukker
  • rosiner
  • smør
dynegrøt

Slik gjer du:

  1. Ha mjølka i ei kasserolle med tjukk botn.
  2. Kok opp medan du rører heile tida.
  3. Ha i grautrisen og rør godt.
  4. La småkoke i ca 20 min, til grauten har tjukna og riskorna er passe mjuke. Rør avogtil.
  5. Ha i saltet og server med smørauge, sukker, kanel og rosiner.
grøt

Slik lagar du dynegraut:

  1. Ha mjølka i ei kasserolle med tjukk botn.
  2. Kok opp medan du rører heile tida.
  3. Ha i grautrisen og rør godt.
  4. Set på lokk og pakk ei dyne (eller avispapir/pledd) rundt gryta. Eller set den i steikeomnen på 30-40 grader.
  5. La grauten stå og trekke i 3-4 timar.
  6. Ta grauten ut av omnen, den er sikkert akkurat passe varm til å ete. Viss ikkje set du den på plata og gir den eit lett oppkok. Har grauten blitt for tjukk sper du berre med litt mjølk.
  7. Voilá! Nydeleg graut, som ikkje er brend og som nesten har laga seg sjølv!

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Likar du det du ser på bloggen her? Bestill mi første kokebok her!