Tomatsuppe med ekstra vitamin

Visste du at paprika inneheld fire gongar så mykje c-vitamin som appelsin? Vi brukar mykje paprika her i heimen, både i supper, sausar, gratengar og smoothie.

I denne suppa har eg skjult paprika og gulrot, utan at nokon merka det! I dette tilfellet gjeld ”det du ikkje veit har du ikkje vondt av”, og så håpar vi at alle held seg friske med litt ekstra vitamin innabords.

Til ca 4 porsjonar treng du:

• 1 løk
• 2-3 fedd kvitløk
• 1 raud paprika
• 2 gulrot
• 1 ss olje (oliven/raps/solsikke/kokos)
• 1 liter vatn
• 2 grønsaksbuljongar
• 2 boksar hakka tomat
• 1 ss tomatpuré
• 1 dl fullkornmakaroni
• 1 ts timian
• salt og peppar

Tilbehør:

• Snøfrisk
• friske urter
• godt brød

Dei fleste ingrediensane ovanfor finnast i økologisk variant, så unngår du sprøytemiddelrestar og får i deg grønsakene sitt eige immunforsvar i same slengen!

Slik gjer du:

1. Skjær løk, kvitløk, paprika og gulrot i bitar.
2. Fres grønsakene i oljen til løken har blitt blank.
3. Smuldre grønsakbuljongen over grønsakene og fyll på med vatnet. Kok opp.
4. Tilset hakka tomat, tomatpuré og timian. La småkoke i ti min, til grønsakene er møre.
5. Kjør glatt med ein stavmiksar. Ha i makaroni og la småkoke i 7 min til dei er ferdige.
6. Krydre med salt og peppar.
7. Server suppe med ein raus klatt snøfrisk, friske urter og godt brød.