Smørbrødkjeks med solsikkefrø og havregryn

Denne oppskrifta er henta frå baksida av pakken med lokalprodusert havregryn: Mylnå i Volda lagar «Platetørka Havregryn» og på pakken har dei oppskrifta på «Voldas beste smørbrødkjeks». Det måtte vi sjølvsagt prøve! Eg har justert oppskrifta noko, vi enda opp med å trenge meir mjøl enn det som stod på pakken, så her får du min versjon:

Du treng:

• 2 dl solsikkefrø
• 1 dl sesamfrø
• 1 dl linfrø
• 6 dl havregryn (helst platetørka frå Mylnå sjølvsagt)
• 1/2 dl sukker
• 1 ts salt
• 1 ss hjortesalt
• 150 g smelta smør
• 3,5 dl kulturmjølk
• 1 egg
• ca 7 dl kveitemjøl

Slik gjer du:

1. Bland saman alle ingrediensane, hald tilbake litt av kveitemjølet til å begynne med. (Eg brukte K-spaden på Kenwoodmaskina for å få alt blanda godt i hop.)
2. Kjevle ut deiga til den er ca 1/2 cm tjukk og stikk ut kjeks ved hjelp av eit glas eller liknande.
3. Legg over på bakepapir og bruk eit grillspyd/spisepinne til å prikke kjeksa med.
4. Steik midt i omnen på 200 grader i 10-12 minutt, til kjeksa er gyldne i kanten.
5. Avkjøl på rist og nyt dei med smør og ost:)