Reklame
Havregryn-müsli
Havregryn-müsli er ein enkel müsli med gode frø og kjerner. Sunt kokosfeitt er blanda inn og gir god smak av kokos saman med kokosflaka. Denne oppskrifta gir omlag 3 liter müsli, slik at du slepp å lage nytt med ein gong. For eg tippar du blir like hekta som meg på å starte dagen med syrna mjølk, müsli og friske jordbær. Sa du frukost? Det smakar meir som ein dessert!
Havregryn-müsli
For å lage denne müslien er det enklast at du måler opp frø og kjerner direkte i den boksa eller det glaset du skal oppbevare det i. Eg brukar ei kakeboks, utan julemotiv, og set den direkte på vekta. Då er det berre å nulle ut vekta og byrje å måle. Meir effektivt og mindre oppvask. Min favorittmåte å lage mat på!
Har du lyst å ha tørka tranebær, rosiner eller aprikos i blandinga kan du sjølvsagt blande det inn. Det same gjeld frysetørka blåbær eller bringebær om du er så heldig å finne det på din butikk. For min del er denne laga heilt utan noko bær for å kunne bruke opp siste rest av dei frosne blåbæra i frysaren og nyte av sesongens nye bær. Det finnast ikkje noko betre altså!
Oppskrift på Havregryn-müsli
- 550 g Helios havregryn
- 3-4 ss Helios kokosolje
- 1 klype salt
- 200 g Helios solsikkekjerner
- 150 g Helios sesamfrø
- 75 g Helios graskarkjerner
- 100 g Helios kokosflak
- 100 g Helios linfrø
- 50 g Helios chiafrø
Smelt kokosolje i ei stor gryte eller steikepanne. Ha i havregryna og la dei steike til dei blir gylne. Strø over salt og hell dei så utover eit bakepapir for avkjøling.
Rist kokosflaka i steikepanna til dei er gylne, legg så til avkjøling.
Mål opp alle frø og kjerner.
Bland saman avkjølt havregryn, avkjølte kokosflak, frø og kjerner.
Oppbevar müslien på tett glas eller i ei tett boks og nyt med syrna mjølk og friske bær.
Dette blogginnlegget er reklame for
Helios
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.
