![Pestosalat med ramsløkpesto](https://kvardagsmat.no/wp-content/uploads/2019/05/20190518-_DSC7029-1000x620.jpg)
Pastasalat med ramsløkpesto
Pastasalat med ramsløkpesto er perfekt mat å lage når ramsløksesongen er her, og kjøleskapet har eit glas ramsløkpesto ståande. Har du ikkje det tilgjengeleg så kan du sjølvsagt bruke vanleg grøn pesto i staden, du får ein god pastasalat med det også.
![pastasalat med ramsløkpesto](https://kvardagsmat.no/wp-content/uploads/2019/05/20190518-_DSC7017-768x1024.jpg)
Pastasalat med ramsløkpesto
Ramsløken har blitt ein favoritt, etter at eg endeleg fann ut korleis den såg ut for nokre år sidan. Etter det har eg funne ramsløk fleire plassar i nærleiken, og når eg først går forbi ei skråning plukkar eg med meg ein bukett blad.
![Pestosalat med ramsløkpesto](https://kvardagsmat.no/wp-content/uploads/2019/05/20190518-_DSC7024-768x1024.jpg)
Ramsløk skal vere både bakteriedrepande, soppdrepande og godt for fordøyelsen i følge Urtekilden. Difor har eg ofte kokt meg ein kopp vatn og hatt i nokre opprevne blad etter ein tur der eg har funne blad. Perfekt å gi kroppen noko å styrke seg på etter ein tur ute.
![Pestosalat med ramsløkpesto](https://kvardagsmat.no/wp-content/uploads/2019/05/20190518-_DSC7027-768x1024.jpg)
Med denne salaten får du alle dei gode eigenskapane til ramsløken i tillegg til den gode smaken, og som bonus kan du kose deg med den i eit par dagar etterpå. Nydeleg som lunsj eller som tilbehør til anna middag dersom du får restar.
Oppskrift på Pastasalat med ramsløkpesto
- 250 g pastaskruar
- 1 pk (75 g) ruccola
- 1/2 purre
- 5 ss soltørka tomat i olje
- 3 ss ramsløkpesto
- 4 ss solsikkekjerner
- Salt og pepar
Kok pasta til den er al dente, altså framleis har tyggemotstand og avkjøl under rennande kaldt vatn. La renne av seg i eit dørslag. Rør inn ramsløkpesto
Grovhakk ruccola og del purre i ringar.
Hell av oljen frå dei soltørka tomatane og del i bitar.
Vend alt saman, krydre med salt og pepar og strø solsikkekjerner på toppen. Nyt!
Salaten kan oppbevarast i tett boks i kjøleskap i 2-3 dagar.
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.