Eplesalat med appelsindressing
Eplesalat med appelsindressing er søt, syrleg og frisk. Perfekt å ha på eit kaldtbord eller eit tapasbord med andre rettar! Eller som eit godt tilbehør til lunsjen eller middagen. Nemnde eg at den er kjapp å lage også? Finn fram epler og appelsiner og gå i gong!
Eplesalat med appelsindressing
Appelsinsdressingen fortener eigentleg eit eige innlegg, for denne kan du bruke til andre typar salatar også. Det er vanlege ingrediensar som olivenolje, sennep, honning og sitron i tillegg til den søte appelsinsafta. Nydeleg farge og nydeleg smak. Valmuefrøa fekk eg lyst til å prøve å ha i etter å ha sett eit lekkert bilete på pinterest, og dei blei liksom prikken over i’en. Rist saman og server!
Oppskrift på Eplesalat med appelsindressing
Eplesalat
- 3 epler
- 2 appelsiner
- 100 g grøn salat (spinat/ruccola/salatblad)
- 1 dl pistasjenøtter
- 1 dl rosiner
Appelsindressing
- 1/2 appelsin
- 1/2 sitron
- 1-2 dl olivenolje
- 2 ss honning
- 1 ts grov sennep
- 1/2 ts salt
- 2 ts valmuefrø
Skjær av skallet på appelsinene og del i skiver. Vask epla godt og del dei i skiver også.
Leg salatblad, eple- og appelsinskiver på ein stor tallerken.
Lag dressingen. Riv det gule og oransje skalet av sitronen og appelsina ved hjelp av eit zesterjarn. Press ut safta og bland saman med skalet og resten av dressingingrediensane. Har du eit tomt glas med lokk er det berre å ha alt i glaset, skru på lokket og riste til alt er blanda.
Ringle dressingen over eplesalaten, og strø hakka pistasjenøtter og rosiner på toppen. Velbekomme!
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.
