![blomkålvinger](https://kvardagsmat.no/wp-content/uploads/2018/09/20180821-_DSC4925-1000x620.jpg)
Reklame
Blomkålvingar
Blomkålvingar er ein av dei beste måtane å servere blomkål på. Utan tvil! Det er ikkje vanskeleg å lage heller, men blomkålen må få litt tid i omnen før det heile er klart til servering. Nydeleg sprø og sticky utanpå, og mjuk og god inni. Er det berre små blomkål å finne på butikken? Då anbefalar eg at du plukkar med deg to! For dette forsvinn fort.
![blomkålvingar](https://kvardagsmat.no/wp-content/uploads/2018/09/20180821-_DSC4908.jpg)
Blomkålvingar
Eg har brukt røykt paprika, sidan det er å finne i krydderskuffa mi. Har du ikkje den røykte versjonen så kan du bruke vanleg paprikakrydder i staden. Kryddera kan du sjølvsagt eksperimentere med slik du vil, her får du ein av mine favorittar.
![blomkålvingar](https://kvardagsmat.no/wp-content/uploads/2018/09/20180821-_DSC4917.jpg)
Til blomkålvingane serverer eg her dipp laga av cashewnøtter, men om du vil bruke rømme med litt krydder i staden så kan du fint gjere det. Alt er lov, og nesten alt er godt til dette!
![blomkålvingar](https://kvardagsmat.no/wp-content/uploads/2018/09/20180821-_DSC4919.jpg)
Oppskrift på Blomkålvingar
Blomkålvingar
- 1 blomkålhovud
- 1,5 dl mjøl (gjerne glutenfritt)
- 2 dl (plante)mjølk
- 1 ts løkpulver
- 1 ts røykt paprika
- 1 ts spisskummen
- 1/2 ts kvitløkspulver
- 1 ts salt
- 1 klype chili
Glasering
- 3 ss lønnesirup
- 1 ts Helios tamari (soyasaus)
- 1 ts sesamfrø
- 1 ts riven ingefærrot
- 1/4 ts pepar
Cashew-dipping
- 100 g Helios cashewnøtter
- 6-7 ss vatn
- 1 ss sitronsaft
- 1 klype salt
- Litt nykverna pepar
Set omnen på 200 grader over- og undervarme. Del blomkål i bukettar og fordel utover eit bakepapirkledd steikebrett.
Steik blomkålen i 20 minutt.
Visp saman mjølk, mjøl og krydder i ei flat skål.
Dypp dei omnsbakte blomkålbukettane i røra, og legg tilbake på steikebrettet. Steik i nye 20 minutt.
Rør saman ingrediensane til glaseringa, ingefærrota riv du på eit zesterjarn eller eit lite rivjarn. Pensle blomkålbukettane med glasering og steik i 5-7 minutt til.
Lag cashewdipping ved å køyre saman bløytlagde cashewnøtter med resten av ingrediensane i ei matmølle. Har du gløymt å bløytlegge nøttene kan du koke dei i ti minutt og så skylle dei i kaldt vatn i staden.
Nyt blomkålvingar og dip med det same!
Dette blogginnlegget er reklame for
Helios
Skrive av Anita
Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.