Sjokoladekake frå “Slikkepott”

sjokoladekake

Matbloggsentralen arrangerer OL-kake utfordring der kravet er at kaka skal innehalde kremfløyte. Dette passa veldig bra for meg som nettopp har fått «Slikepott»-boka i julegåve. Boka er nemleg full av fristelsar som eg gler meg til å teste ut. Ei kake skilde seg ut då eg las den første gongen; med tittelen «Sjokolade, sjokolade, sjokolade» hamna den fort på førsteplass i utprøvingskøa. Denne kaka inneheld totalt ein halv kilo mørk sjokolade! Dette er verkeleg ein draum for sjokolade-elskarar! Som fyll og glasur er det oppvarma kremfløyte blanda med hakka sjokolade –også kalla ganache. Og dermed passa den perfekt til denne utfordringa; ei litt annleis kremfløyte-kake!

Det er berre å handle inn og gå i gong. Her får du min versjon (med nokre ørsmå justeringar):

sjokoladekake

Du treng:

  • 200 g mørk sjokolade
  • 200 g smør
  • 1 dl sterk kaffi
  • 170 g kveitemjøl
  • 1 ts bakepulver
  • 200 g sukker
  • 200 g brunt sukker
  • 3 egg
  • 0,75dl mjølk

Sjokoladeganache:

  • 300 g mørk sjokolade
  • 3 dl kremfløyte

Til pynt:

  • Bringebær
  • Kokos

 

Slik gjer du:

  1. Set omnen på 160 °C og kle ei kakeform på 22cm med bakepapir i botnen og smør innsida. Hakk sjokoladen og smelt den saman med smør og kaffi i ein bolle over vatnbad.
  2. Bland sikta kveitemjøl, bakepulver, sukker og brunt sukker i ein bakebolle. Pisk egga til dei blir luftige og bland inn mjølka. Hell sjokoladeblandinga og egga over det tørre, og rør alt saman.
  3. Ha røra over i forma og steik på nederste rille i ca 1 t og 30 min. Sjekk om den er steikt ved å stikke ein kakepinne/strikkepinne/ukokt spaghetti midt i kaka. Den kan gjerne vere litt mjuk, men du skal ikkje ha røre igjen på pinnen. Avkjøl kaka heilt (eg lot den stå over natta) før du deler den i tre lag.

Sjokoladeganache:

  1. Finhakk sjokoladen og ha den i ein bolle. Kok opp kremfløyta og hell litt av den over sjokoladen. Rør med slikkepott heile tida og fortsett å ha kremfløyta over litt etter litt. La den stå slik at den stivnar litt, rør avogtil.
  2. Ha ganachen mellom laga og ha resten på toppen.
  3. Pynt med bringebær og eventuelt kokos rundt kanten -litt snø må ein ha når det er vinter-OL:) Oppbevar kaka i kjøleskap.

Sjokoladekake frå “Slikkepott”

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Kjøp gjerne kokeboka mi som kom ut i 2018.