Nyttårs-bord

Nyttårs-bord

Så er siste kvelden i året her, og vi har ete nydeleg pinnekjøtmiddag saman med familie. Bordpyntinga i dag er det mange som har spurt etter fleire bileter av, så eg nyttar nokre minutt av den lange kvelden til å dele desse bileta med dykk.

På bordet er det kvit duk (veldig greit når mamma stiller med ferdigstrøken duk….halve jobben gjort med ein gong) pynta med einer og konglar henta frå skogen. Med to gutar som ivrige hjelparar er jo dette fort gjort å få samla og samtidig få bonusen av å lufte seg litt på ein dag som denne.

I tillegg til det som er henta frå skogen har vi pynta med julekuler i ulike gull/beige/kopar fargar og telys i ulike glas og stakar.

Serviset har mamma arva frå ei tante, og sjølv om det er over 50 år gammalt er det heilt inntakt og så fint behandla. Gullkantar passar jo fint på ein slik dag!

Og så glas med stett då. Massevis av glas med stett! Det kan jo like gjerne drikkast vatn av, og gjer verkeleg bordet til eit festbord spør du meg.

Serviettringane som er stjerneforma med gullskimmer er kjøpte i Kuala Lumpur, nettopp med tanke på nyttår. Då er jo stjerne like passane kvart eit einaste år.

Håper bileta inspirerte deg til å dekke eit skikkeleg festbord ved neste høve, og så ønskjer eg deg eit aller siste GODT NYTT-ÅR!