Valnøttrundstykke

valnøttrundstykke

Denne oppskrifta kan og lagast som 3 brød, slik det opprinneleg var tenkt då dei var vinnar av ei oppskriftskonkurranse i Sunnmørsposten for nokre år sidan. Valnøttene er lagt til etter anbefaling frå forfattarane av “Go’bitar frå besta si kokebok -tradisjonsmat frå Sunnmøre”, der eg har funne oppskrifta. Om du vel å lage brød eller rundstykke er opp til deg, god heimelaga bakst vil du uansett få.

Du treng:

  • ½ pk tørrgjær
  • 12 dl lunka vatn
  • 1 ss salt
  • 1 ss sukker
  • ½ dl lys sirup
  • 3 ss rapsolje
  • 200 g sammale kveite, grov
  • 200 g sammale rug, grov
  • 100 g havregryn
  • 1300 g kveitemjøl
  • 200 g (1 boks) valnøtter
flette rundstykke flette

 

(Dei to bileta over som viser korleis du flettar deiga er lånt frå ein annan gong eg baka, dersom du stussa over at du såg linfrø i deiga..;)

rundstykke
  1. Finhakk valnøttene for hand eller ved hjelp av maskin.
  2. Bland alle ingrediensane og elt i maskin i ca 10 min.
  3. Dekk med plast (bruk gjerne ei eingongs badehette) og la heve til dobbel storleik.
  4. Bruk mjøl på bakebordet og kjevle ut til eit rektangel med ca 1 cm tjukkleik.
  5. Del opp i strimlar og flett tre og tre strimlar saman til ei flette.
  6. Del opp fletta i passe rundstykke.
  7. Sett på bakepapirkledd steikebrett og la etterheve under plast i ca 30 min.
  8. Steik på 200 grader i 10-15 min, til rundstykka er gylne under.
  9. Avkjøl på rist.
sunnmørsbrød

Pakk rundstykka du får til overs i brødposar og legg i frysaren. Skru omnen på 180 grader varmluft og varm rundstykka direkte frå frysaren i 12-13 min. Som nysteikte igjen!

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Her på bloggen finn du enkle oppskrifter på mat laga frå botnen heime på kjøkkenet vårt.