Havrekjeks

Havrekjeks med smør og brunost funkar bra både til god frukost og som noko godt til kaffien etter middag. Ofte like populære blant born som vaksne, og fine å ha på lur.

Desse fann eg oppskrift på i ei julebok, men havrekjeks funkar like bra heile året spør du meg!

Deiga treng ikkje heve, og er lett å arbeide med. Bruk godt med mjøl når du kjevlar den tynt ut og stikk ut kjeks med eit glas eller ei form. Fin oppgåve å få hjelp av born til!

Havrekjeks:

• 2 dl mjølk
• 50 g smør
• 250 g havregryn
• 125 g kveitemjøl
• 2 ss sukker
• 1 ts hornsalt

Slik gjer du:

1. Kok opp mjølk og smør, og hell det over havregryna.
2. La det trekke inn i gryna før du eltar inn mjøl, sukker og hornsalt til ei jamn deig.
3. Set omnen på 200 grader over- og undervarme.
4. Kjevle deiga tynt ut og stikk ut kjeks med eit glas eller ei form.
5. Legg kjeksa på bakepapirkledd steikebrett og steik midt i omnen i 10-12 min, til dei er gylne i kanten.
6. Avkjøl på rist og oppbevar i tett kakeboks.

Nytast med smør og ost, og ein god kopp kaffi til.

Oppskrifta er henta frå Norsk Julemat av A. Strømstad