Grilla makrell med agurksalat

Vi har brukt mykje tid ute i båt i vår, med fisketroda klar. Resultatet har blitt fiskekaker, øving på filetering (treng framleis ganske mykje øving der gitt) og introduksjon for nye fiskesortar. I butikkane er det jo som regel berre torsk og laks å finne, så nye sortar har vore varmt velkomne. Med fiske-app på telefonen og sjø-vande folk med på tur har me lært mange nye fiskeslag.

Grilla makrell med agurksalat

Makrellen var likevel enkel å kjenne igjen då han beit på troda, og det måtte bli grilla fisk til middag. Sidan makrellen er å finne i fjorden frå juni til november gjeld det å nytte høvet medan sesongen er her. Ikkje minst sidan makrell blir rekna som ein av dei aller enklaste fiskane å få på kroken. Og det er det som er fiskeglede om du spør kidsa og meg. Vi har litt lite tålmod til å vente på denne laksen som aldri bit..

Men tilbake til makrellen. Grilla makrell er enkelt å lage til. Fjern hovudet på fisken, ta ut innmaten og skyl og tørk den. Krydre med salt og pepar i midten, legg gjerne ei sitronskive eller to inni og pensle skinnet med nøytral olje. Skjær tre små snitt i skinnet på kvar side og legg den så rett på grillen. Har du problem med at fiskeskinnet heng fast i grillen sjå tipa her:

Grilltips for fisk

• Pensle skinnet godt med nøytral olje.
• Pass på at grillrista er rein.
• Bruk høg temperatur/direkte varme til å begynne med, då vil ikkje skinnet henge igjen i grillrista.
• Grill fisken på toppen av nokre sitronskiver eller aluminiumsfolie dersom det er umogleg å få til tipsa over.