Brennsnut med fenalår

betasuppe

Brennsnut er ein av mine absolutte middagsfavorittar, og det eg tyr til oftast når det skal serverast mat til mange. Då vi inviterte familien til 7-års bursdag rett over nyttår nytta eg høvet til å bli kvitt restane av fenalåret samtidig.

Kraft av fenalår er nemleg noko av det beste du kan lage brennsnut av, og gir ein heilt aldeles nydeleg smak på suppa. Har du denne krafta kan du putte nesten kva som helst opp i gryta og få eit fantastisk resultat uansett.

I bursdagen fekk kidsa pølse med brød, medan vi vaksne åt opp to store gryter med salt og god brennsnut. Gryta stod på omnen med skåler og flatbrød ved sidan av, så kunne kvar og ein velje kor mykje og kor ofte ein ville forsyne seg.

lapskaus fenalår

Her i heimen er det i allefall slik at fenalåret smakar absolutt best dei første gongane ein skjær av det, og så  blir det siste kjøtet verande på låret utan at nokon forsyner seg meir av det. Viss du vel å koke kraft av det kan du berre la dette kjøtet sitte igjen på låret, og få deilig kjøt til suppa.

Når eg kokar brennsnut brukar eg aldri mål eller vekt, og resultatet blir likevel godt kvar gong. Smak på krafta at den ikkje er for salt, ellers kan du alltids krydre rett før servering, eller setje fram salt og peppar på bordet. Då kan du lage ei gryte utan så mykje krydder til born, medan vaksne som gjerne vil ha litt ekstra kan krydre sjølve.

Eg oppgir framgongsmåten for omlag fire personar, så får du velje sjølv kor mykje du vil lage, alt etter kor stor gryte og kor mange du skal servere til. Lag uansett ein stor porsjon, for dette er genial middag å fryse ned og ta opp for rask middag. Vi hadde sjølvsagt brennsnut til middag mandagen etter barneselskapet;)

brennsnut av fenalår

Til den beste brennsnuten treng du kraft og den lagar seg eigentleg sjølv. Kok gjerne kraft ein dag du har god tid og skal vere heime, så kan gryta stå på omnen medan du gjer andre ting. Krafta frys du ned eller oppbevarer i kjøleskap til du treng den. Slik gjer du det:

Kraft:

  • 1 løk
  • 2-3 gulrot
  • 1 purre
  • 1/2 sellerirot
  • 1-2 laurbærblad
  • 1 ss eplecidereddik

Oppskrift:

  1. Ha fenalår (gjerne delt i to) saman med vaska og grovhakka grønsaker i ei stor gryte.
  2. Fyll på med kaldt vatn til alt er dekka, ha i laurbærblad og eplecidereddik. (Eddiken er viktig for å dra mest mogleg av minerala og godsakene ut av beinet.)
  3. Kok opp, fjern skummet som legg seg på toppen (viss du gidd) og la småkoke så lenge du har tid, minimum 4 timar. Eg vil gjerne la krafta koke i allefall eit døgn, og set gryta i steikeomnen på omlag 60 grader om natta.
  4. Ta ut beina, la avkjøle og plukk av kjøtet.
  5. Sil krafta, grønsakene kan du kaste.
  6. Ha krafta tilbake i kasserolla og la koke utan lokk, slik at vatnet fordampar og krafta blir meir konsentrert. Då er det lettare å oppbevare den, så kan du berre spe med vatn når du skal bruke den om den er for konsentrert.
fenalår kraft lapskaus

Tips til frysing:

  • Avkjøl brennsnuten godt, ha den i ei boks med lokk (t.d. ei isboks), men vent med å ha på lokket til brennsnuten er kald.
  • Oppbevar i frysaren, og  set den i kjøleskapet til tining kvelden før du skal ha den til middag. Då er det berre å ha den i ei kasserolle saman med ca 1 dl vatn og varme opp på middels-høg varme. Fiks ferdig middag på få straksar, og nesten ingen oppvask!
brennsnut av fenalår

Oppskrift på Brennsnut med fenalår

4-5 porsjonar / Tid: 30 min (+ evt. 4t for kraft)

Brennsnut

  • 2-3 gulrot
  • 4-5 potet
  • 1/2-1 sellerirot
  • 1 pastinakk
  • 3-4 vårløk (eller purre)
  • 1 søtpotet
  • 1 pk middagspølser (eller grillpølser)
  • 1-2 liter kraft + kjøt frå kraftbeinet
  • Salt og peppar
  • Friske urter på toppen
  1. Skrell og del alle grønsaker i terningar.

  2. Ha kraft i ei stor gryte, ha i grønsakene og fyll på med vatn til alt er dekka.

  3. Kok opp og la småkoke til grønsakene er møre. Dette er avhengig av kor store og kva type grønsaker du har, men etter småkoking i 15 min er som regel alle klare.

  4. Del pølser og kjøt i bitar.

  5. Ha i pølser og kjøt rett før grønsakene er ferdige, og la dei koke med siste minutta.

  6. Krydre med salt og peppar og server med flatbrød til.

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Her på bloggen finn du enkle oppskrifter på mat laga frå botnen heime på kjøkkenet vårt.