Tex-mex form med bønner og ris

Dette er ei skikkeleg digg og enkel taco-form som er lett å like. Kosemat som kan etast med berre ein gaffel eller ei skei, gjerne oppattvarma tilbakelent i sofaen. Retten er god nok til å serverast på ein helgekveld med familien men likevel enkel nok til å lagast på ein heilt vanleg kvardag, så her er det berre å gå i gong på kjøkkenet. Varier mengden chili alt etter kor sterkt du eller borna vil ha det.

Tex-mex form med bønner og ris

Til 4-6 personar treng du:

• 400 g kjøttdeig
• 2 dl jasminris
• 2 ts olivenolje eller kokosolje til steiking
• 1 raud paprika
• 1 liten løk
• 1/2 raud chili
• 2 ss tacokrydder
• 1 ts salt
• 1/2 ts spisskummen
• 1/2 ts koriander
• 1/2 ts peppar
• 400 g svarte bønner
• Cheddar og mozzarellaost til topping
• Tortillachips og lime

Slik gjer du:

1. Set omnen på 180 grader.
2. Skyl risen godt i eit dørslag, og kok 2 dl ris med 4 dl vatn.
3. Del løk og paprika i bitar og finhakk chilien.
4. Steik kjøttdeiga til den er gjennomsteikt og ha i løken siste minutta og steik med til den blir blank.
5. Ha over tacokrydder, paprika og chili og bland godt.
6. Skyll bønene godt i eit dørslag før du har dei over kjøttdeiga.
7. Bland inn spisskummen og koriander i den ferdigkokte risen, og bland ris og kjøttdeig.
8. Krydre med salt og peppar.
9. Ha over i ei eldfast form, strø ost på toppen og gratiner i 10-15 minutt til osten har smelta.
10. Server med tortillachips og lime til:)

Inspirasjon til denne retten fann eg i det australske bladet «Clean Eating» mar/apr 2015 utgåva, men laga med eigen vri.