Verdas beste peparkaker

verdas beste peparkaker I bloggverda må tittelen minst vere verdas beste om ein skal nå fram i den store julekake-jungelen! Men eg overdriv ikkje her altså! Detter ER verkeleg verdas beste peparkaker! Eg hugsar at mamma fekk oppskrift frå ei veninne då vi var små, og det er eit før og eit etter den oppskrifta kom i hus. Vi har baka den kvart år heime, ofte i to porsjonar og med dobbel oppskrift… Vi har ete peparkaker frå tidleg advent til langt ut på nyåret. Først med mest mogleg melis og flest non stop på, i tenåra gjerne dyppa i ein varm kopp med te bøygd over lekseboka og som vaksen med blåmuggost og litt honning på. Mmmmmmm! Deiga er knallgod å jobbe med, og gjer at det er kjekt å bake for born også. Du lagar deiga kvelden før, set den i kjøleskap over natta og er klar til baking dagen etter. Oppskrifta er stor nok til at du kan kaste den klumpen som minstemann slikka på eller mista på golvet, eller du kan dele deiga i to og bake over to dagar som vi ofte endar opp med, sidan det ofte er stas å bake berre første brettet for dei minste….;) Du treng:

  • 3 dl vatn
  • ½ dl lys sirup
  • 2 ss kanel
  • 2 ss nellik
  • 2 ss ingefær
  • 750 g sukker
  • 2 ss natron
  • 425 g smør
  • ca 1400 g kveitemjøl

pepperkaker peparkake verdens beste pepperkaker peparkakedeigbake pepperkaker Slik gjer du:

  1. Bland saman vatn, sirup, krydder og sukker og gi det eit lett oppkok, set til side for litt avkjøling.
  2. Smelt smøret og ha i natron. La det boble og frese ferdig før du blandar det med krydderblandinga.
  3. Elt i mjølet litt etter litt til du får ei fast fin deig. Eg stoppar som regel på 1350 g, og har heller litt mjøl i bakhand når vi skal bake.
  4. Pakk deiga inn i plast og legg den i kjøleskap. (Sjå tips under)
  5. Bruk mjøl på bordet når du kjevlar den ut, stikk ut pepperkakefigurar og legg dei på bakepapirkledd steikebrett.
  6. Steik midt i omnen på 200 grader til dei er gylne i kanten, alt frå 5-10 min. Følg med.
  7. Avkjøl på rist før du legg dei i kakeboksen eller pyntar med melis og Non Stop.

verdens beste pepperkaker TIPS:

  • Det er veldig mykje lurare å pakke deiga inn i plast enn å ha den i ein bolle med lokk. Har du den i ein bolle er det nemleg nær umogleg å få deiga ut frå bollen den første timen etter at du tek deiga ut frå kjøleskapet… Og kven hugsar vel å ta ut deiga så lenge før…?
  • Start med ein liten klump deig og kna den godt slik at den blir passe varm og lett å jobbe med. Ta med ein ny liten bit av den kalde deiga for kvar gong, slik at deiga ikkje blir for varm -då er den best å jobbe med.
  • Ha same størrelse på figurane på kvart brett (…eg veit; umogleg oppgåve når borna er med. Men når dei er leide kan du gjere det;) slik at ikkje nokre blir brende og andre for mjuke.
ginger thins

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Her på bloggen finn du enkle oppskrifter på mat laga frå botnen heime på kjøkkenet vårt.