Fiskesuppe med kvitvin

Fiskesuppe med kvitvin er enkel å lage og smakar mildt og godt slik ei fiskesuppe skal gjere. Det som tek mest tid er å koke inn kvitvinen, så gå i gong og få gjort ferdig punkt 1 og 2 før du tek deg tid til å gjere klart resten av ingrediensane og kanskje dekke på bordet. Når punkt to er over er nemleg fiskesuppa klar på ti minutt:)

Fiskesuppe med kvitvin til ca 4 personar:

• 2 ss ghee/smør/solsikkeolje
• 3 sjalottløk
• 1-2 gulrot
• 1-2 blad fennikel
• 1/4 sellerirot
• 4 dl kvitvin
• 1 l kraft eller vatn + fiskebuljong/grønsaksbuljong
• ½ dl fløyte
• 1 ss créme fraiche
• 2 ss brokkoli
• 3 ts maizena + 1dl kaldt vatn
• ca 400 g laks
• ca 400 g torsk (eller anna kvit fisk)
• salt og peppar

Slik gjer du:

1. Del løk, gulrot, fennikel og sellerirot i små bitar og fres saman med smøret til løken blir blank.
2. Ha i kvitvinen og la dette koke inn til det er ca 1 dl væske igjen. (Dette tek 20-30 min.)
3. Medan du ventar delar du fisken i terningar og måler opp resten av ingrediensane.
4. Ha i vatnet og fiskebuljongen og gi suppa eit raskt oppkok.
5. Rør ut maizena i 1 dl kaldt vatn og hell den i suppa medan du rører.
6. Kok opp suppa på nytt, før du skrur ned på svak varme og tilset fiskebitane, brokkoli i bitar, fløyte og créme fraiche.
7. La suppa trekke på svak varme i 5-6 min til fisken er ferdig.
8. Smak til med salt og peppar.
9. Server med godt brød:)