Superenkel FISKEGRATENG

superenkel fiskegrateng

Superenkel fiskegrateng er verkeleg så enkel som den høyres ut. Denne versjonen treng verken forkoking av makaroni eller fisk, og er laga på 1-2-3.

Eg trudde knapt det kunne gå bra då ivrige facebooktilhengjarar kom med desse innspela, men dette blei veldig veldig bra, og er ein super kvardags-fiskegrateng. Tusen takk for innspel og gode oppskriftsdelingar!

Kjøpeversjonen har ikkje sjangs i konkurranse mot denne. Prøv så ser du også:)

Til ca 4 personar treng du:

  • 400 g rå torsk
  • 125 g ukokt fullkornmakaroni
  • 3 vårløk
  • 3 egg
  • 2-3 ss smør
  • 2-3 ss kveitemjøl
  • 5 dl mjølk
  • 1 klype muskat
  • Salt og peppar
  • 2 knuste knekkebrød

Slik gjer du:

  1. Lag kvit saus ved å smelte smøret og røre inn kveitemjølet. Spe med mjølka litt og litt, rør kraftig og la det koke opp mellom kvar gong for å unngå klumpar. Krydre med muskat, salt og peppar. La småkoke i 5 min. Bland i makaronien og sett til side slik at det avkjøler seg litt.
  2. Skjær opp torsken i terningar og vårløken i skiver.
  3. Bland egga i den kvite sausen, vend inn torsk og vårløk.
  4. Ha over i ei eldfast form, strø over knust knekkebrød. Steik midt i omnen på 225 grader i ca 45-50 min.

Server med kokte poteter, gulrot og smelta smør.

Herleg kvardagsmiddag, utan stivpisking av eggekvitar og koking av makaroni og fisk, takka vere gode kommentarar på facebook! Tusen takk for fine innspel:)

Skrive av Anita

Eg som står bak denne matbloggen heiter Anita, og likar best å stå på kjøkkenet eller på ein fjelltopp her på Sunnmøre. Her på bloggen finn du enkle oppskrifter på mat laga frå botnen heime på kjøkkenet vårt.